Մայիսի վերջին ավարտեցինք «Առաջին օգնություն» դասընթացը՝ ծրագրով նախատեսված երեք համայնքներում։ Արդյունքում Չարենցավանի, Աշտարակի և Փոքր Մասրիկի 16–18 տարեկան 45 պատանիներ ձեռք բերեցին առաջին օգնության կայուն հմտություններ։

Ծրագրի իրականացման ընթացքում կատարվել են նախնական բյուջեով նախատեսված ծախսերի որոշակի փոփոխություններ։

Բյուջեի կատարում

Նպատակ 1 — 130 000 դրամ (ք. Աշտարակ, ք. Չարենցավան)

• Հրահանգիչների ժամավճար — 120 000 դրամ
• Հրահանգչի ճանապարհածախս (Երևան–Աշտարակ) — 10 000 դրամ

Նպատակ 2 — 175 000 դրամ (գ. Փոքր Մասրիկ)

• Հրահանգչի ժամավճար — 100 000 դրամ
• Հրահանգչի ճանապարհածախս (Մարտունի–Փոքր Մասրիկ) — 75 000 դրամ

Դրամահավաքի շնորհիվ անհրաժեշտ 305 000 դրամից հավաքագրվել է 220 000 դրամ։ Մնացած 85 000 դրամը տրամադրվել է «ՈԱՄ» ՀԿ-ի կողմից։

ք. Աշտարակ

Աշտարակի արհեստագործական պետական ուսումնարանի սաների համար կազմակերպված «Առաջին օգնություն» դասընթ��ցը հաջողությամբ ավարտվեց աշակերտների ակտիվ մասնակցությամբ և մեծ հետաքրքրվածությամբ: Դասընթացի ընթացքում մասնակիցները ձեռք բերեցին առաջին օգնության կարևոր գիտելիքներ և հմտություններ՝ ներառյալ արտակարգ իրավիճակներում արձագանքելը, վերքերի մշակումը, սթրեսային իրավիճակներում հանգիստ գործելը:

Դասընթացն ավարտվեց եզրափակիչ գործնական վարժանքով, որի ընթացքում աշակերտները կիրառեցին ստացած գիտելիքները իրական իրավիճակներին մոտ սցենարներում: Վարժանքը ցույց տվեց մասնակիցների ինքնավստահության, թիմային աշխատանքի, արագ կողմնորոշվելու և գործնական հմտությունների զգալի առաջընթաց: Ընդհանուր առմամբ, ծրագիրը դարձավ արդյունավետ և օգտակար փորձառություն՝ նպաստելով պատանիների կյանքի փրկությանը միտված գիտելիքների և պատասխանատվության զգացման զարգացմանը:

գ. Փոքր Մասրիկ

«Առաջին օգնություն» նախագծի շրջանակում, եռամսյա դասընթացները սկսել ենք նաև Փոքր Մասրիկ սահմանային գյուղի պատանիների համար: Մեզ համար հատկապես կարևոր է ունենալ հնարավորություն՝ սովորեցնելու առաջին օգնության հմտությունները սահմանային գյուղերի պատանիներին:

ք. Աշտարակ

Ավարտին է մոտենում Աշտարակի արհեստագործական պետական ուսումնարանի սաների համար կազմակերպված «Առաջին օգնություն» դասընթացը: Դասընթացների մասնակիցները սովորել են հմտորեն վիրակապել, դադարեցնել արյունահոսությունը, ցուցաբերել առաջին օգնություն անգիտակից տուժածներին, կիրառել պատգարակ և տարհանել: Նախատեսվում է դասընթացների ավարտին կազմակերպել ամփոփիչ վարժանք: 

Սիրելի աջակիցներ, ուրախ ենք տեղեկացնելու, որ «Առաջին օգնություն» նախագիծը արդեն գտնվում է իր գործարկման փուլում: Ձեր աջակցության շնորհիվ Չարենցավան և Աշտարակ քաղաքների 16-18 տարեկան պատանիներ ստացան հնարավորություն` ձեռք բերելու անհրաժեշտ գործնական գիտելիքներ և ձևավորել առաջին օգնության հմտություններ:

Ք. Չարենցավան

«Առաջին օգնություն» եռամսյա դասընթացին հնարավորություն ունեցան մասնակցելու Չարենցավանի ավագ դպրոցի 21 աշակերտներ: Դասընթացների ավարտը ամփոփեցինք դեկտեմբերի 12-ին՝ ավարտական վարժանքով: 

Վարժանքի ժամանակ պատանիները ցուցադրեցին դասընթացների ընթացքում ձեռք բերված իրենց գիտելիքները և գործնական հմտությունները տարբեր արտակարգ իրավիճակներում՝ վթար, փլատակներ, կոտրվածքներ, հրազենային վերքեր: Մասնակիցները հմտորեն կարողացան գնահատել վտանգի գոտին` ապահովելով սեփական անվտանգությունը` ցուցաբերել անհրաժեշտ առաջին օգնությունը տուժածներին: Մասնավորապես. զննել տուժածներին, կանգնեցնել արյունահոսությունը, վիրակապել, վերականգնել գիտակցությունը, կազմակարպել տարհանումը` օգտագործելով առաջին օգնության համար նախատեսված պարագաները, բացակայության դեպքում` փոխարինելով ձեռքի տակ եղած այլընտրանքային միջոցներով:

Միջոցառմանը ներկա էին «ՈԱՄ» ՀԿ-ի ներկայացուցիչները, դպրոցի տնօրենը, ՆԶՊ առարկայի ուսուցիչը, բուժքույրը, այլ ուսուցիչներ: Դասընթացի մասնակիցներն ստացան «Առաջին օգնություն» դասընթացը հաջողությամբ ավարտելու հավաստագրեր: Դպրոցի տնօրինության հետ ձեռք բերվեց պայմանավորվածություն` շարունակել համագործակցությունը և տարվա ընթացքում պարբերաբար անցկացնել վարժանքներ՝ ձեռք բերված գիտելիքները ամրապնդելու և թարմացնելու նպատակով:

Ք. Աշտարակ

«Առաջին օգնություն» եռամսյա դասընթացներ ենք կազմակերպել Աշտարակի արհեստագործական պետական ուսումնարանի սաների համար: Դասընթացները ընթացքում են, կավարտվեն մարտ ամսին: