«Առաջին օգնություն» նախագծի շրջանակում կիրականացվի տեսական և գործնական պարապմունքների դասավանդում՝ 16-18 տարեկան պատանիների համար, երեք համայնքներում՝ ք. Աշտարակ, ք. Չարենցավան, գ. Փոքր Մասրիկ:

Ընթացիկ մարտահրավերներ

Մինչ օրս մեր երկրի քաղաքացիական պաշտպանության խնդիրներից մեկն է բնակչության լայն զանգվածների շրջանում առաջին օգնության վերաբերյալ գիտելիքների և հմտությունների բացակայությունը: Հայաստանում հաճախակի են երկրաշարժները, շատ ճանապարհատրանսպորտային պատահարներ ավարտվում են զոհերով: Արտակարգ իրավիճակներում և դժբախտ պատահարների դեպքում առաջին օգնությունը էական դեր է խաղում մարդկային կյանքեր փրկելու գործում: Նման իրավիճակներում օգնություն ցուցաբերելու հմտությունների և կարողությունների բացակայությունը հաճախ հանգեցնում է վիրավորների մահվան՝ մինչև շտապօգնության ժամանումը: Պատերազմի ժամանակ մահացածների և վիրավորների թիվը շատ ավելի քիչ կլիներ, եթե ժամանակին ցուցաբերվեր համապատասխան առաջին օգնություն կամ ինքնօգնություն:

Առաջին օգնությունն ի գործ

Մեր նպատակն է նպաստել դիմացկուն սերունդ ձևավորելուն, որը կկարողանա համապատասխանաբար արձագանքել վաղվա ճգնաժամերին՝ բնական աղետներից մինչև մարդածին վթարներ: Ուստի, «ՈԱՄ» ՀԿ-ն՝ մեր երկրի տարբեր համայնքներում, 16-18 տարեկան պատանիների համար կազմակերպում է «Առաջին օգնություն» գործնական պարապմունքների արտադասարանական դասընթացներ: Դասընթացը հնարավորություն կտա պատանիներին ձեռք բերել անհրաժեշտ գործնական գիտելիքներ և ձևավորել առաջին օգնության հմտություններ, մասնավորապես.

• Արյունահոսության դադարեցում: Վիրակապում:
• Տուժածի զննում և տարհանում (էվակուացիա): Տուժածների դասակարգում (տրիաժ):
• Կրծքավանդակի վնասվածքներ (պնևմոթորաքս) և որովայնի բաց վնասվածքներ (աղեթափություն):
• Շոկ. տարբերակել տեսակները, կանխարգելել զարգացումը:
• Շնչառության սուր խանգարումներ, շնչուղիների խցանումը օտար մարմնով:
• Անգիտակից տուժած, կողքային անվտանգ դիրք (ԿԱԴ): Սիրտ-թոքային վերակենդանացում (ՍԹՎ):
• Հենաշարժիչ համակարգի վնասվածքներ: Պատգարակի կիրառում:
• Առաջին օգնություն արտաքին ազդակներից առաջացած վիճակներում:
• Առաջին օգնություն օձերի և թունավոր միջատների խայթոցների դեքում:

Դասընթացը ներառում է 24 պարապմունք: Յուրաքանչյուր դասընթացի մասնակիցների թիվը կազմում է 15-ից մինչև 20 հոգի: Դասընթացի մասնակիցները կստանան ավարտական վկայականներ:

«Առաջին օգնություն» դասընթացի բյուջե

Նախագծի առաջին փուլում կկազմակերպվի դասընթացներ երեք համայնքներում՝ ք. Աշտարակ, ք. Չարենցավան, գ. Փոքրիկ Մասրիկ: Դրամահավաքի միջոցները կուղղվեն հրահանգիչների ժամավճարի և, ըստ անհրաժեշտության, ճանապարհածախսի փոխհատուցմանը:

Նպատակ 1 - 130 000 AMD (ք. Աշտարակ, ք. Չարենցավան)

• հրահանգիչների ժամավճար - 120 000 AMD
• հրահանգչի ճանապարհածախս (Երևան - Աշտարակ) - 10 000 AMD

Նպատակ 2 - 215 000 AMD (գ. Փոքր Մասրիկ)

• հրահանգչի ժամավճար - 120 000 AMD
• հրահանգչի ճանապարհածախս (Մարտունի - Փոքր Մասրիկ) - 95 000 AMD

Յուրաքանչյուր խմբի (20 հոգի) ուսուցման համար անհրաժեշտ առաջին օգնության ուսուցողական պարագաները տրամադրվում է «ՈԱՄ» ՀԿ-ի կողմից:

Մեր մասին

«Որոնողափրկարարական ակումբների միություն» ՀԿ-ն հիմնադրվել է 2021թ.: Մեր առաքելությունն է օգնել ձևավորել հասարակություն, որտեղ մարդիկ պատրաստ են արտակարգ իրավիճակներին և տիրապետում են առաջին օգնության հմտություններին: Մենք տրամադրում ենք գիտելիքներ և փորձ, որոնք սովորական քաղաքացիների կյանքն ավելի անվտանգ են դարձնում, հնարավորություն են տալիս պատրաստվել և ճիշտ կողմնորոշվել ցանկացած ճգնաժամի ժամանակ: Մեր նպատակն է նպաստել համընդհանուր անվտանգությանը, ամրապնդել պետության և հասարակության կապը: